Mat 24 | KPG | STEP | Jesus ne hagatanga i di Hale Daumaha, gei ana dama agoago ga lloomoi, ga helekai gi mee bolo gi mmada gi nia hale o di Hale Daumaha!

a 24.9:Mt 10.22

b 24.13:Mt 10.22

c 24.15:Dan 9.27, 11.31, 12.11

d 24.17-18:Lk 17.31

e 24.21:Dan 12.1; Rev 7.14

f 24.26-27:Lk 17.23-24

g 24.28:Lk 17.37

h 24.29:Is 13.10, 34.4; Ezek 32.7; Joel 2.10, 31, 3.15; Rev 6.12-13

i 24.30:Dan 7.13; Zech 12.10-14; Rev 1.7

j 24.37:Gen 6.5-8

k 24.39:Gen 7.6-24

l 24.43-44:Lk 12.39-40

Matthew 24

Jesus e helekai i di mooho o di Hale Daumaha

(Mark 13.1,2; Luke 21.5,6)

1 Jesus ne hagatanga i di Hale Daumaha, gei ana dama agoago ga lloomoi, ga helekai gi mee bolo gi mmada gi nia hale o di Hale Daumaha! 2 Gei mee ga helekai, “Uaa, goodou mmada gi humalia gi nia hale huogodoo. Au e hagi adu gi goodou di tonu bolo ma dahi hadu ga dubu dono lohongo ai. Nia hadu huogodoo ga meheu gi lala.”

Nia haingadaa mono hagaduadua

(Mark 13.3-13; Luke 21.7-19)

3 Jesus nogo noho i hongo di Gonduu Olib, ana dama agoago ga lloomoi gi mee mada ginaadou, ga heeu, “Hagia mai gi gimaadou di madagoaa behee dela ga gila ai nia mee aanei, gei nia haga modongoohia behee ala ga haga modongoohia doo hanimoi mo di hagaodi o di madagoaa.” 4 Jesus ga helekai, “Pula i goodou, hudee dugua anga goodou gi halahalau ina go tangada. 5 Nia daangada dogologo ga lloomoi i dogu ingoo, ga helekai boloo: Au go di Mesaia, gei digaula ga halahalau nia daangada dogologo. 6 Goodou ga longono nia lee dauwa hoohoo mai mono longo dauwa mogowaa, gei goodou hudee mmaadagu i nia mee aanei e hai. Nia mee aanei e hai loo gi hai, malaa, hagalee bolo go di hagaodi o henuailala deenei ga hai. 7 Nia henua ga heheebagi, gei nia henua llauehe ga heheebagi i nadau mehanga. Nia dau magamaga, ngalungalua tenua ga kila i nia gowaa huogodoo i henuailala. 8 Nia mee aanei huogodoo le e hai be di mmae matagidagi o di ahina ma ga haanau. 9 Nia daangada ga lawalawa goodou, ga lahi ga hagaduadua ge e dadaaligi gi mmade. Nia henua ga de hiihai adu gi goodou mai i di au. ^a 10 Di madagoaa deelaa, digau dogologo ga kili gi daha nadau hagadonu, ga hagadau hagi aga ginaadou, ga hudiou i nadau mehanga. 11 Nia soukohp dilikai dogologo ga kila aga, ga halahalau nia daangada dogologo. 12 Nia aloho o nia daangada dogologo ga maa gi daha, idimaa nia huaidu ga damana mai. 13 Tangada dela ga daahi hua beelaa dono hagadonu ga dae loo gi di hagaodi, ga hagamouli. ^b 14 Di Longo Humalia o Tenua o God ga hagadele ang gi nia gowaa huogodoo i henuailala, e hai di haga modongoohia gi nia daangada huogodoo. Nomuli laa, gei di hagaodi o henuailala la ga hai.

Di ada mee huaidu e haga madagudagu dangada

(Mark 13.14-23; Luke 21.20-24)

15 “Goodou ga mmada gi di ada mee huaidu e haga madagudagu dangada dela ne helekai ai soukohp Daniel, e duu i lodo di gowaa dabuaahia.” (Tangada dela ga dau di mee deenei, gi modongoohia dono hadinga!) ^c 16 “Malaa, digau ala e noho i Judea, gi llele gi tomo nia gonduu lligi. 17 Tangada dela i tomo dono hale, hudee hai bolo ia e gaga gi lala e gowaga ana mee i lodo dono hale. ^d 18 Tangada dela i lodo dana gowaa, gi hudee hanimoi bolo e kae dono gahu. 19 E haingadaa ang gi nia ahina hai dama, mono gau ala nadau dama lligi. 20 Dalodalo ang gi God bolo goodou gi hagalee llele gi daha i di madagoaa magalillili, be go di Laangi Sabad. 21 Idimaa, di haingadaa o di madagoaa deelaa, koia e huaidu i nia haingadaa mai taamada o henuailala, ga dae mai gi dangi nei. Di mee beenei e gila aga maalia ai. ^e 22 God gu haga hogoohi nia laangi aalaa. Maa nei bolo mee digi haga hogoohi nia laangi aalaa, tangada e mouli ai. Gei God ga haga hogoohi nia laangi aalaa ang gi ana daangada ne hilihili. 23 Maa tangada ga helekai adu gi goodou boloo: Mmada, deenei di Mesaia! be, Deelaa a mee! hudee hagadonu ina a mee. 24 Idimaa, nia mesaia mono soukohp dilikai ga kila aga, ga hai nadau ada mee haga goboina mono mogobuna belee halahalau nia dama a God ala ne hilihili, be di maa e mee. 25 Hagalongo gi humalia, au gu haga iloo adu gi goodou i mua nia mee aanei ma ga hai. 26 Be digaula ma ga helekai adu gi goodou boloo: Mmada, mee dela i lodo di anggowaa! hudee hula gi golo. Gei digaula ma ga helekai boloo: Mee dela e bala hagammuni i kinei! Hudee hagadonu ina. ^f 27 Idimaa, Tama Tangada ga hanimoi e hai gadoo be di ila dela e daba e ina i di bahi i-dua, ga dae gi di bahi i-dai o di langi hagatau. 28 Di gowaa dela iai tuaidina dangada made, deelaa di gowaa e hula ginai nia ‘vulture’. ^g

Di hanimoi o Tama Tangada

(Mark 13.24-27; Luke 21.25-28)

29 “I muli nia haingadaa llauehe o nia laangi aalaa, di laa ga bouli, di malama ga hagalee maahina, nia heduu ga monnono ia, nia mogobuna o lodo di ahiaalangi ga mmaanege gee mo nadau lohongo. ^h 30 Deenei di madagoaa o di haga modongoohia Tama Tangada ga gila i di gili di langi, gei nia daangada huogodoo i henuailala ga tangitangi i di nadau gidee Tama Tangada ga hanimoi i hongo nia gololangi i ono mahi mo ono madamada aamua. ⁱ 31 Di lee labaa damana ga ILI, gei mee ga hagau ana gau di langi gi nia mada e haa o henuailala, ga haga dagabuli ana gau ala gu lawa di hili, daamada i di mada o henuailala, ga dae gi di baahi dela i golo.

Di agoago di laagau-‘fig’

(Mark 13.28-31; Luke 21.29-33)

32 “Goodou gi kae ina di agoago mai di laagau-‘fig’. Di madagoaa nia manga ma ga balabala, gei nia lau ga daamada ga matilitili mai, gei goodou gu iloo hua bolo di madagoaa mahanahana la gu hoohoo mai. 33 Gei e hai labelaa beenei, maa goodou ga gidee nia mee huogodoo aanei, goodou ga iloo bolo di madagoaa la gu hoohoo mai. 34 Gi langahia goodou bolo nia mee aanei huogodoo ga hai i mua digau huogodoo ala e mouli dangi nei ga mmade. 35 Di langi mo henuailala ga hagalee, gei agu helekai e deemee di hagalee.

Tangada e iloo ia di laangi mo di aawaa ai

(Mark 13.32-37; Luke 17.26-30,34-36)

36 “Tangada e iloo di madagoaa e dau mai di laangi mo di aawaa deelaa ai. Digau di langi i nua mo Tama e de iloo labelaa, go Tamana hua e iloo. 37 Di hanimoi o Tama Tangada le e hai gadoo be tolongo Noah. ^j 38 Nia laangi i mua toloo, nia daangada e haihai nadau hagamiami ge inuinu, nia daane mono ahina gu bida haga hai lodo ginaadou, ga dae gi di laangi ne ulu Noah gi lodo dono waga. 39 Gei nia daangada digi modongoohia loo bolo di mee ga hai, ga dae loo gi toloo deelaa ne hai, gu hagammaa gi daha digaula huogodoo. Gei deenei hogi di hai ga hai i di madagoaa ga hanimoi Tama Tangada. ^k 40 Di madagoaa deelaa, nia daane dogolua e ngalua i lodo henua, tangada e dahi ga lahi gei di hoo o maa la ga dubu i golo. 41 Nia ahina dogolua e mmili nau palaawaa, di ahina e dahi ga lahi, gei di hoo o maa la ga dubu i golo. 42 Goodou la gi noho kanakana, idimaa, goodou e de iloo di laangi dela ma ga hanimoi ai di godou Dagi. 43 Maa tangada donu o dono hale ga iloo di madagoaa tangada gaiaa ma ga hanimoi ai, goodou gi donu humalia, bolo mee ga haga ala hua e hagalee dugu ang gi tangada gaiaa gi ohaa dono hale. ^l 44 Malaa, nia madagoaa huogodoo gi togomaalia, idimaa, Tama Tangada le e hanimoi i di aawaa dela hagalee talitali goodou a mee.

Tangada hai hegau manawa dahi be hagalee manawa dahi

(Luke 12.41-48)

45 “Tangada hai hegau behee dela koia e manawa dahi, gei e kabemee? Deenei tangada dela ne haga menege aga go dono dagi belee dagi nia daangada hai hegau ala i golo, gei e wanga nadau meegai i di madagoaa belee wanga ai. 46 E maluagina behee go tangada hai hegau i di madagoaa dono dagi ga hanimoi gi di hale, ga gidee ia bolo mee e hai dana hegau deenei. 47 Au e hagi adu gi goodou bolo di tagi ga haga menege aga tangada hai hegau deelaa, e dagi ana mee huogodoo. 48 Maa mee tangada hai hegau huaidu, geia ga hagamaanadu bolo dono dagi le e duai nau dono hanimoi. 49 Geia ga daamada ga dadaaligi digau hai hegau ala i golo, ga miami ge e inuinu madalia digau libaliba. 50 Di tagi o tangada hai hegau deenei ga hanimoi i di laangi mo di madagoaa hagalee kana go mee. 51 Mee ga hanimoi ga duuduu a mee, ga bae a mee gi baahi digau hai hegau ngudu golomada i di gowaa dela e dangidangi, gei e gadigadi ono niha.